Vor langer langer Zyt - me weiss es nümme so gnau - hets ungereinisch im voue lääre NÜÜT e huere lute Knau gäh.
Und genau vo denn a het sech s' ganze universelle Universum i sich säuber afo bewege und dräie und gschanghangizigerlifisionöögele, das es eim so richtig usgschtuunet het.
Und mits i dere universale Bewegig (Puff, Chaos) si haut au d' Zeiger nümm stüu gstange.
Ab au däm düredräie:
JO !!
es isch ne !!
Dr UHR-KNAU
Aui Götter und angeri Topmanager, wo denn zumou no gmeint hei öpis z'säge gha z'ha,
|
Nume dr helvetisch Gott MATT-ER-HORN (wele süsch ?) het no müesse nürze:
"Joooohhh ! das isch jetz aber gschpässig - do fäut no s'feschtliche Humbatätärä zum Abschluss vo dere grad gschtartete Evolution !"
Zäme mit dr spanische Göttin EL-FIESTA-GRANDE, em arabische Gott AL-ARM-UHR, em französische Gott LOUIS-TROP-TARD, em chinesische Gott FASCH-ING und em englische Gott DRUNK-IN-CARNIVAL het er sech de mou berote.
Nach langem diskutiere, abwäge, chäre u chifle si sie de mou zum Schluss cho:
"We mer de scho die vierti Dimension am laufe hei, müesse mer das doch fiire - mit Lampe füue - oder ?
Mir bruche sowiso meh Feschtivitäte und Musig ! (Wein, Weib + Gesang)
In GRANICA (jetze Gränche) hei mer doch scho d'Zytliputzer agsiedlet.
Was gits de bessers aus grad dört ä Faschingszunft und de nächer no grad ä Uhremusig vo dere Faschingszunft lo z'entstoh ?"
Nach mehrere Missverständnis vo wäge Uhrknau, Uhrmacher (Uhrmönsch), Uhrgrossöutere, Uhrlaub und Uhremusig isch de anno 1951 die erschti Gränchner-Festivitäte-Uhremusig aus
"Guggemusig vo dr Faschingszunft Gränche"
gründet worde.
|
Mit me z'fridne Lächle und grosser Gnuegtueig hei die Götter dem Narretriibe mou zuegluegt und d'Entwicklig/Nöigründig vo Zünft und Guggemusige beobachtet.
Jetz aber Haut emou !! (1)
Nach gnöuerem aneluege und grad z'rügg vom Fielmann het sech d'Emannze-Göttin MIR-WEI-AU so chönne ergöuschtere, dass die wiibliche Geschöpf uf dere Wäut, trotz eigete Frauezünft, au no Zuegang i die letschte Männerbastione hei müesse ha.
